《因為係乜乜達人所以屌大力啲，有咩問題？》

■ 27.11.2016

博客劍心喺日本居酒屋出醜事件，似乎隨住當事人公開道歉，店家接受道歉並刪 post 而暫告一段落。喺今次事件中批評劍心嘅人佔大多數，主調離唔開身為「日本達人」，卻喺日本做出咁丟臉嘅事。

呢道要公道講句：其實香港人喺外地丟臉都唔係第一日嘅事[1]。訂咗旅館唔去、食嘢顧住影相、couchsurfing 唔同屋主交流、喺公眾地方行為不檢⋯⋯呢啲嘢只要有一單半單上到 Facebook，都會惹來群眾聲討，但頂多鬧半日就無咗件事，好少好似今次居酒屋事件咁持久。

所以，當你將果位博客睇成一個普通香港人，佢今次所受嘅待遇係唔公平、唔對等嘅。袒護佢嘅人大多會同意呢一點，同時指斥香港人（尤其代為道歉果班）玻璃心、崇日。

但事實係唔係咁呢？事實係「將劍心睇成一個普通香港人」呢個前設，本身就相當離地。姑勿論有人多年來靠偷圖偷片出 post 賺廣告費、靠一堆名銜呃飲呃食有幾咁乞人憎，你揹得起達人呢個朵，享受到身為達人嘅好處，就好應該有返達人嘅智慧同修養。無，你就係欺世盜名搵笨柒，罪加一等，被網民追住黎屌係應有此報。

你落街場 hea 踢，頂多被隊友寸鳩你尋晚扑完野今日跑唔郁；美斯場上散步被人 cap 晒片鬧仲叫佢「散步帝」，因為佢係球王美斯。你踢學界魯莽食紅牌返到更衣室會被教練屌幾句，碧咸世界盃踢人食紅牌被全英國屌足幾年，因為佢係萬人迷碧咸。夾硬話美斯同碧咸[2]「只係一個普通足球員」得唔得？實無錯架，不過離地囉。我都係普通足球員黎架，同美斯分返一半人工得唔得先？

保佢嘅人係咪全錯？未必。錯唔錯並非視乎你喺件事上面嘅立場，而係因為你提出嘅論點荒謬或離地 (or both)。大眾對於有名氣（或者自我吹捧）嘅人有一定程度 expectation 係人之常情。喺批評香港人玻璃心之前，不如先顧掂自己離地離到上大氣層嘅問題丫？

[1] 不過就唔好同我講外國人都會咁呀。人類應該追求進步，而唔係好似支那人咁用臭蟲論打飛機。

[2] 用美斯同碧咸做比喻算係對佢兩個嘅侮辱，但鬼叫我諗唔到更適合而大家一睇就明嘅例子咩。sorry～

--

● 如 果 你 也 喜 歡 我 的 作 品 ， 請 Like 我 的 Facebook 專 頁 ，或 把 文 章 分 享 給 朋 友 。

[Facebook]  [Common Blog]  [Story Blog]  [Photo Album]
E-mail: amethian.studio@gmail.com