2018年3月10日星期六

《一切皆自願,無咁多身不由己》



■ 10.3.2018


返新工一段時間,遇上排山倒海嘅工作,勉強湊夠時間休息+養病,點難捱都總算捱到星期五可以鬆一鬆。
屋企電腦成個星期無開過,之前影落啲相自然就停咗成個星期無郁過。印象中除咗出國旅行同埋壞電腦之外都好少可幾日唔開機,今次算係比較特殊。
前兩日 OT 完搭車返歸,我坐喺巴士上層,進入一個半瞓半思考嘅狀態。我諗:其實人生係好簡單,簡單在一切都係 give and take; 人生又可以好複雜,複雜在一切都係 give and take.
揀得開工做嘢,拍拖嘅時間自然少咗;唔想因為咁而影響感情生活,就要喺其他部份抽時間—— be it 休息時間、同朋友摸杯底嘅時間、留嚟上堂學一門手藝嘅時間 etc., 又或者用錢買時間:搭的士。當樣樣嘢都好似好重要,樣樣嘢都好似唔放棄得,順得哥情又失嫂意,個人就會迷茫、混亂。往往只會記住自己「被迫」放棄咗啲乜,忘記係因為當初放棄咗一啲嘢,先至享受到而家拎到喺手嘅嘢。

苦困皆自願,一切皆自願。邊有咁多人在江湖,邊有咁多身不由己?就算有一下或者好幾下覺得左手又係肉手背又係肉,要揀啲乜放棄啲乜其實一早有答案,答案就係喺你發現有兩難局面果一刻嘅下一秒。如果真係諗嚟諗去都決定唔到,咁可能係兩個 choices 都唔係你心中所想。
可能講到有啲模糊但無計,病人諗嘢係無咁快同無組織得咁好,但本身嘅思考能力並唔會受影響。
好啦,我要犧牲我嘅休息時間繼續去執相先。





--

●             Like   Facebook   ,或         

[Facebook]  [Common Blog]  [Story Blog]  [Photo Album]
E-mail: amethian.studio@gmail.com