《唔做好準備就衝上山睇雪嘅盲毛：無常識、無sense、無賴》

■ 25.1.2016

一個寒流，就睇得出其實大家骨子裡都好信政府。

山路結冰，數百人被困。有意外就將所有責任推晒比政府，話政府無經驗、天文台乜乜乜……喂，大家幾時變到咁信任政府架？啲龍門搬晒去邊？

好簡單，我一早就覺得政府係廢嘅，所以根本無理過佢——除非大家肯走出黎促成港獨，否則都係要忍受呢個仆街政府。

嘩！零度呀！結冰喇！一齊上山影相咯！咪住先——即係咁，零度大約有幾凍？嚴寒上山要帶幾多裝備知唔知？著對普通 Nike 會跌到仆街又知唔知？本身有無行開山，體能又好到咩程度？背囊有無帶多幾 pack 朱古力呀？揸車果啲無玩過 rally都知要換條胎啦下話？最後最後，「量力而為」四個字，就算小學老師無教但你點都有聽過掛？

連基本常識都無就貿貿然上山，呢種行為絕對稱唔上熱血，而係戇鳩，係對自己生命唔負責任。出咗事就淨係識賴人，完全無半點覺得麻煩到人地嘅歉意，都算係無賴。無頭無腦無裝備一野衝上山，凍你唔死真係要劏雞還神啦，仲要怨呢樣怨果樣？凍壞左個腦呀？救援人員都未出聲，幾時輪到你班盲毛講野？

無專業知識，靠常識都仲可以充撐場面；無常識都唔緊要，只要個人有 sense 應該都好少出事。可惜驟眼所見，好多人係三樣都無。香港人，你個政府廢因為你無得投票，都仲可以理解丫；但做人有返多少常識，有返多少 sense，應該唔會太難吧？

--

● 如 果 你 也 喜 歡 我 的 作 品 ， 請 Like 我 的 Facebook 專 頁 ，或 把 文 章 分 享 給 朋 友 。

[Facebook]  [Common Blog]  [Story Blog]  [Photo Album]
E-mail: amethian.studio@gmail.com