《狗仔追車棄養疑雲，證明眾多網民未曾從歷史中得到教訓》

■ 3.2.2016

昨晚一段片段流出，片中可見一隻狗在馬路上對一輛汽車窮追不捨，惹來棄養寵物疑雲，聲討之聲不絕。

網民對於事情發展嘅反應流程，可以大致總結如下：

1. 睇到條片，就一口咬定車主棄狗，屌晒車主祖宗十八代不得好死；

2. 到翌日《東方》報導車主並非狗主本人，就話《東方》講野信唔過；

3. 到《蘋果》都報導埋同一件事，就話車主大話連篇作故仔呃人；

4. 到知道車主真係唔係狗主，就屌個司機話有乜可能咁都睇唔到隻狗；

5. 到《壹週刊》出報導寫到明「現在該名網民已把小狗還給老伯，並證清指整件事跟車主無關」，都仍然毫無理由地鳩屌，要幾核突有幾核突，龍門都搬到上火星。

仲記得前年雨革嗎？928 前後謠言滿天飛，

一時話解放軍已經候命出動；

一時話防暴警察已發射橡膠子彈；

一時話乜乜軍營開始調動軍人；

一時話警方動用聲波炮……爭在未誇張啲講埋核彈已經發射。

似是而非嘅消息引來好多人以至政治組織瘋傳，令原本已經緊張嘅局勢更為緊張。

當其時我察覺到問題存在，已 經 率 先 出 post 呼 籲 ，希望大家唔好將一啲未證實嘅消息亂咁傳開去。奈何當時正值鉅變，人鬼難辨，下一個鐘頭會發生乜野都係未知數，陣腳大亂亦是有理可尋。

但過咗咁耐，一路走來去到今時今日，網民仍然一次又一次被大大小小嘅流料玩殘。

唔係咩？遠嘅講到最大單有去年六月青衣新沙士「確診」疑雲，比較近期嘅亦有兩單：誤傳般咸道石牆斬樹位置封水泥（香港01報導；及後已澄清並致歉），同埋今次狗仔追車事件。好明顯睇到，幾件事件中仍然有大把人未經過思考，無經過求證之前就出咗聲先。

而每逢被踢爆跟車太貼，總會有唔認柒嘅人咁樣狡辯：

「我跟車太貼？我緊張咋！我想件事好咋！」

「係咪無人跟進就最開心？」

「就算唔係真，都要關注，提高警覺！」

藉口一大堆，點都唔承認自己跟車太貼有錯，仲掉轉頭要人 appreciate 佢為咗件事操心——真係多謝晒喎。

喂大佬呀，可唔可以搞清楚事情真相先再講？明明唔係有事又亂咁嗌，同「狼來了」有乜分別先？連自己做錯都無勇氣去認，一味死兜爛兜，呢種行徑難道會比政府班仆街高尚好多？

計我話呢，就唔駛下下都仆出黎柒嘅。凡事睇定啲先，用下個腦諗下會唔會有你眼見以外嘅其他可能性。唔係話見條片好爆、見到篇文個標題好 juicy 就趕住拜山咁 share 咗先。咁樣對件事只會無幫助，亦會使你變得更柒，令到一路以黎信你嘅人失望，更令本身已經唔係好信你嘅人徹底放棄你，完全係一啲好處都無。

咁多位，乖啦。要叻要威，到真相大白之後再慢慢認都未遲。到時你點囂張點認叻，人地都無辦法唔寫個服字畀你。點都好過唔知頭唔知路走去加把口，變成讓謠言一直流傳嘅幫兇啦。

--

● 如 果 你 也 喜 歡 我 的 作 品 ， 請 Like 我 的 Facebook 專 頁 ，或 把 文 章 分 享 給 朋 友 。

[Facebook]  [Common Blog]  [Story Blog]  [Photo Album]
E-mail: amethian.studio@gmail.com