《唔再理人地？係做得到先好講喎～》

■ 16.11.2016

閒時我都鍾意聽小朋友講下佢地嘅感情問題。而好衰格地，每次聽到有人講「我以後唔會再理佢！」，我都會即刻質返幾句：

「係真係唔理你先好講喎！」

「嗱，話唔理又理正契弟呀下。」

「挑，過兩日你咪忍唔住去搵人～」

結果呢？結果咪就係 100 次有 99 次都被我講中，命中率直迫國際明燈比利、本地明燈燒山。講就天下無敵，做就……「我講下咋喎」。明明今朝先誓神劈願要過新生活，太陽都未落山啫已經話掛住人。呢種情況，屢見不鮮。

以後唔理？挑，人地出個 status 你咪又係心思思～呃邊個啫。

明明好想關心人，但礙於面子，偏偏就話以後唔撚理；人地向你示好你就鬧走人，之後就話人地唔侵你玩搞針對；成日話人唔了解自己，到人地好聲好氣問喇，又嫌人地蠢解釋都費事。喂，咁嘅人邊會有人愛架，你地話係咪？畀我遇著個咁難頂嘅八婆我都即走啦，仲留喺度嫌被人虐待得唔夠咩？

我同小朋友講，做人最緊要忠於自己。係，就話係，唔係，就話唔係；掛住就話掛住，放唔低就認放唔低；有錯就認，傷害到人就設法補救。連面對自己嘅勇氣都無，你呢世人都唔駛旨意做到大事。誠實面對自己嘅感覺，唔駛怕樣衰，因為點樣衰都唔衰得過你口不對心。次次都講得出但做唔到，彈出彈入，真係幾柒的。

唉，咪睇我好似好口臭好撚 mean 咁。Believe it or don't, 我暗啞底係好錫啲小朋友的。

--

● 如 果 你 也 喜 歡 我 的 作 品 ， 請 Like 我 的 Facebook 專 頁 ，或 把 文 章 分 享 給 朋 友 。

[Facebook]  [Common Blog]  [Story Blog]  [Photo Album]
E-mail: amethian.studio@gmail.com