2015年6月25日星期四

《致賣樣作家: 你 地 無 做 錯 !》






■ 25.6.2015


有時打開 Facebook,見到有人好激烈地反對某些經常暴露自己美貌的作家,或者從早到晚叫他們收皮、回家吃大便,我反而覺得:「嘩!使唔使呀?」


你以為人地專登賣樣呃 Like ?非也。其實人地係講緊道理,但你知啦講道理好多時都會悶,悶就無人睇,齋出字又略嫌太寡,所以先加張相叫做襯托下咁解。問題係佢自知影相技術麻麻,但又唔想好似垃場 D100 咁偷圖當自己野(好肉酸架嘛),無計可施之下,唯有用自己平時無聊影低兼唔小心用美圖獸獸加左少少 effect 果啲自拍照頂住先,貪佢夠就手丫嘛。一張 Chok 爆自拍加一句「最愛自己的人從來只有自己」,嘩,你睇下幾咁勵志,幾有哲理,我呢啲凡人學一世都唔駛旨意學得到。倘若咁都要被人話係姣屍燉篤搏收兵的話,我真係無野好講。


亦都有人咁講:「賣樣就去做 Model 啦,寫埋啲野又唔係好睇!」……喂,你咁講即係強人所難啫。有頭髮邊個想做癩痢?如果人地真人有咁上鏡嘅晨早就做左 Model 啦,而家就算唔係拍緊電影都應該接到幾條廣告仔拍下,仲邊得閒坐響度玩美圖獸獸、諗爆頭寫啲高深大道理?係咁易用下個腦都諗到啦,下話。唔好睇?人地一個 post 兩行字 3000 Likes,數據贏到你連車尾燈都望唔到,你憑咩話人地唔好睇?你又有無聽過人恥笑 Justin Bieber(7200 萬 Likes)同 One Direction(3700 萬 Likes)唔Q識唱歌?無丫嘛?正所謂 haters gonna hate,人地講兩句啲 Like 數多過你一篇時事分析文,你恨唔到咁多架喇。


OK,你話人專登賣樣喇,偶像派喇,但你又有無諗過其實偶像派都可以有實力?偶像派只係一個名詞,好多被歸類為偶像派嘅人暗啞底其實好有料到。就以歌手為例,以音準見稱嘅樂壇才女 Stephy 鄧麗欣就出過書——唔止一本,係好多本,其中一本叫《陪著我走》堪稱代表作,09 年推出之後一度成為網民熱話;國際巨星 Justin Bieber 除左歌藝高超、舞術精湛之外,仲自創出極具個人特色嘅底橫新著法,絕對係走響時裝界尖端;台灣方面最近亦出左一位地質學專家炎亞綸,用佢嘅嶄新理論震驚鳥全球七十億人。由此可見偶像派並非淨係得個樣,亦唔等於係廢柴、無料到。而且我有信心呢班藉住一片苦心拋頭露面嘅作家,將來嘅成就肯定唔會比上面提到呢三位名人少。


所以,我警告你地,咪再亂咁批判呢班賣樣作家。佢地之所以選擇賣樣呢條路,只不過係做唔成真 Model 或者一時三刻搵唔到啱用嘅配圖咁解,絕對唔係好似你地諗到咁衰格,話人地要靠樣寫垃圾文呃 Like 收兵搏出位咁低莊。平心而論,以呢班作家咁好嘅文筆,你覺得佢地由今日開始唔賣樣嘅話,對 Like 數會唔會有影響?呢條問題咁簡單,我就唔答喇。


我想跟賣樣作家講句加油,響呢度容我用曾偉雄腔講一句: 我 想 話 畀 大 家 聽 , 你 地 無 做 錯 到 !


圖片來源:蘋果日報


P.S. 就算寫到幾明顯都總係有人唔明,因此我只好多口講多句:呢篇其實係曲線。

P.P.S. 成日出樣嘅作者,唔駛咁快覺得受到冒犯喎——我只係話緊果堆死剩個樣又無料到嘅文壇蝗蟲。係有料的話,呢支地圖炮絕對唔會射得中你,你大可以安心企埋一邊食花生。


--

●             Like   Facebook   ,或         

[Facebook]  [Common Blog]  [Story Blog]  [Photo Album]
E-mail: amethian.studio@gmail.com

沒有留言:

發佈留言