《做人不要太雲佩斯》

圖片來源： www.telegraph.co.uk

■ 11.10.2015

今季剛剛去咗土耳其踢波嘅雲佩斯，最近上咗新聞。可惜唔係因為表現好，而係因為佢呻無正選踢，話坐後備席好唔開心咁話。望住呢條友，睇埋體育新聞報導[1]入面啲片同字，我淨係諗到三個字：「唔專業」。

• 場場有份，仲要猛呻

即係咁，土超聯今季聯賽踢咗七場，七場都有佢份；歐霸四場，佢又踢足四場。對於一個已經卅二歲、過氣、正在走下坡嘅前鋒黎講，待遇算係非常之好。而又話說費倫巴治假假地都係土耳其第二成功球隊（僅次於加拉塔沙雷），又係歐洲賽事常客，唔同中東果啲專 for 人去掘金嘅球隊，根本無需要淪落到犧牲全隊波去就佢一個。而且家陣佢場場都有份踢，只係有時正選有時後備上陣咋喎，仲有乜好怨呢？

• 練波求其，對人黑面

以為扭計出口術爭正選已經好衰？實情最令人火滾嘅係佢啲態度，簡直係反面教材之中嘅經典。練波仲 hea 過中學雞[2]，隊友認真拍手掌時佢就好似死老豆咁閪口閪面[3]，好似全世界所有人都欠咗佢咁。喂，啲態度咁懶散，叫人點畀機會呀？任得佢鳩流流都場場出佢打正選，對其他人公平咩？佢又受得起咩？一個禮拜逗緊百幾萬港紙人工，連做個樣扮下專業都懶，過份啲囉。

• 球隊惡霸，帶壞後生

球壇老將大致上分兩種：一種係愈老愈可愛，體能雖然無以前咁好但非常珍惜上陣機會，場場搏到盡，又會將經驗帶畀班後生仔；另一種就變成球霸，硬係覺得隊波無咗自己唔得，成日幻想自己仲係廿幾歲當 fit 果陣，又要屎波又要扮大佬最後搞到犯眾憎。呢條友屬於邊種，我諗都唔駛多講。

作為球迷，見到一個球員擺出咁唔專業嘅態度，對球隊、隊友、球迷同埋佢自己都唔尊重，真係想講一句：無心踢不如你早啲退休啦。

--

[1] [2] [3] 詳見 報導內文 。

--

● 如 果 你 也 喜 歡 我 的 作 品 ， 請 Like 我 的 Facebook 專 頁 ，或 把 文 章 分 享 給 朋 友 。

[Facebook]  [Common Blog]  [Story Blog]  [Photo Album]
E-mail: amethian.studio@gmail.com