■ 10.10.2016
近日新聞報導，有個廿幾歲嘅女人做傳銷做到月入好高，連樓都買埋。件事本身嘅發展我唔認同，但並唔感到驚訝——反正你夠 guts 去偷呃拐騙而差佬唔拉嘅話，你慢慢變有錢係正常現象。
最令我驚訝嘅係，點解咁耐以黎佢身邊無一個人（親戚、朋友、舊同學 etc.）起佢底、開佢名話佢做傳銷呃人？喂佢呃人喎，你同佢身邊啲親戚朋友都可能出事架喎，你唔將佢身份公諸於世，咪即係任由你親戚朋友啲血汗錢被人呃？你仲係人黎嘅？須知傳銷就係一種靠呃身邊人幫自己賺錢嘅仆街行業，曾經身受其害嘅朋友，一定會明我點解咁講。
有人同我講：「你開佢名，佢會斷六親，好慘架喎。」屌！家陣我就係要佢斷六親呀！做傳銷係呃人係詐騙係雞係公廁，而只有令當事人無辦法響呢行搵到食，先至可以令佢早日脫離。唔好 FF 佢會有日搵夠錢然後突然良心發現金盤洗手啦，白痴仔。斷六親就等如斷佢米路，係最直接令佢脫離傳銷嘅方法。你由得佢繼續呃人，一方面係出賣朋友，另一方面亦係對唔住淪為傳銷騙徒嘅佢。得罪講句，做朋友做到你咁，都真係幾撚仆街下喎。
知情不報，其實咪即係包庇囉。包庇一啲為賺錢不擇手段嘅仆街，犧牲嘅係信任朋友嘅善良之輩。講慘，慘得過咁樣？
我就唔同。過往我一知道邊個做傳銷，我就會喺 Facebook 開佢全名，等我身邊嘅人多多留意、多多提防。原因好簡單：做得我朋友嘅人，我都唔想佢地有機會仆街。（當然可以選擇唔信我。但唔信我之後被人呃，well that’s not my problem.）關心朋友唔係得把口，要有埋實際行動先得。
相反，假如我唔出聲，到有一日有朋友被傳銷騙徒呃錢搞到債台高築，喊住質問我：「點解你一早知佢做傳銷，都唔同我講？」我諗我真係會慚愧到想當場自殺。
利申：誤交損友，上過兩間傳銷公司，最後乜都無簽，反而有錢落袋。嘿嘿。
--
● 如 果 你 也 喜 歡 我 的 作 品 ， 請 Like 我 的 Facebook 專 頁 ，或 把 文 章 分 享 給 朋 友 。
[Facebook] [Common Blog] [Story Blog] [Photo Album]
E-mail: amethian.studio@gmail.com
沒有留言:
發佈留言