《十月一號晚出左去影煙花嘅你，到底諗緊乜嘢？》

■ 3.10.2016

十一匪慶，年年放煙花已成習慣。碌下 Facebook，亦見有個別朋友專程去影煙花。影得靚唔靚？唔係重點，唔評論。反正對果啲專業影相佬黎講，靚器材基本上都係必備嘅。

嗯，都係唔兜圈，直接帶出我嘅疑問：十月一號晚出去海旁影煙花嘅你，到底影乜諗嘢諗緊乜嘢？

2012 南丫海難，對唔少人黎講仍然記憶猶新。果場導致 39 人死亡嘅慘劇，正正就係喺當年十月一號發生。你可以話死者已矣，大家亦未必需要好似六四咁樣，每年呢一日點蠟燭致哀。之但係唔哀悼還唔哀悼，喺呢個咁沉重嘅日子，無理由仲可以若無其事嘻嘻哈哈咁「慶祝」掛？趁人地死忌開 party 呢啲咁無品嘅嘢，你肯定你要做？

講到「慶祝」——其實我真係唔明，到底有乜咁好慶祝。十月一，支那共匪政權成立，多年來成功向世界各地輸出劣等文化。我地身處嘅香港更加係首當其衝，自從 97 年之後不停遭受支那文化入侵：金舖迫走小店，雙非搶奶搶學位，樓價炒到根本買唔起，更加不停有以基建為名掠水為實嘅事件出現，壞事實在罄竹難書。支那身為毒害香港嘅罪魁禍首，用納稅人錢放煙花製造歌舞昇平假象。你去參與、去同佢影相，咁樣同認同緊佢又有咩分別？

「喂，我去影張相啫，有無咁嚴重呀？」事實上，偏偏就係有。負責佔領區清場嘅黑警、喺馬尼拉人質慘劇現場影相嘅菲律賓人都係「影張相啫」，但背後反映出黎嘅就係對人、對事有無基本嘅尊重。絕對比「影張相啫」更沉重。「無諗過應唔應該喺果度影相」，同埋「明知唔應該影相都照影」，兩者都屬於仆街，分別只係程度高低而已。

藝術，就係分辨美醜，就係批判。喺我眼中真正嘅藝術家，係唔會去影果啲血肉煙花的。

十月一號晚有去影煙花嘅朋友，我並唔係話要你即時剷晒啲相，亦唔會詛咒你受皇天擊殺。我只係希望大家停一停，諗一諗。透過相機鏡頭所拍攝嘅相片，意義到底從何而來？你一直以來所追求嘅美感，係咪只係純粹表面嘅五光十色？喺把握機會影相嘅同時，或者更加應該花一啲時間，諗下同我地香港切身攸關嘅事。然後你就會發覺，十月一號嘅煙花，莫講話影唔落，就連行過望到一眼，都覺得噁心。

（提起煙花，不得不提《花火》(Hana-bi) 這部由我最喜歡的導演——北野武自編自導自演的鉅著。和文章內容沒有關係，純粹借位分享。）

--

● 如 果 你 也 喜 歡 我 的 作 品 ， 請 Like 我 的 Facebook 專 頁 ，或 把 文 章 分 享 給 朋 友 。

[Facebook]  [Common Blog]  [Story Blog]  [Photo Album]
E-mail: amethian.studio@gmail.com